ՍԹԱՐ առևտրային ցանցի գործադիր տնօրեն Վահան Քերոբյանի ուղերձը Հայոց Մեծ Եղեռնի 95-րդ տարելիցի կապակցությամբ ( 23.04.2010 )

20-րդ դարի սկզբին Օսմանյան Թուրքիայում պետականորեն ծրագրված ու դաժանաբար իրականացված երիտթուրքական քաղաքականության հետևանքով իրենց տունը, գույքը կորցրած, իրենց զավակներին, ծնողներին, առողջությունը, ի վերջո, հայրենիքը կորցրած մի ամբողջ սերունդ անողոքաբար զրկվեց ապրելու իրավունքից. մեր ժողովրդի մի հսկայական հատված սառնասրտորեն ոչնչացվեց, իսկ որոշ մասը, հաղթահարելով աննկարագրելի դժվարություններ, մազապուրծ եղավ արտերկիր: Մեզ համար, որպես Մեծ Եղեռնը վերապրածների ժառանգներ, սա ոչ միայն դաժան պատմական իրողություն է, այլ նաև' ներկայի ու ճակատագրի անքակտելի մաս:

Այսօր ողջ հայությունը գլուխ է խոնարհում, սգում և իր հարգանքի տուրքը մատուցում Մեծ Եղեռնի անմեղ նահատակների հիշատակին: Երբևէ չմոռանալով անցյալի վիշտը և վերաիմաստավորելով պատմական դասերը' մենք պետք է հպարտությամբ շարժվենք առաջ' կառուցելով կայուն պետություն' հիշելով, որ կայունության գլխավոր գրավականը միասնականությունն է: Համախմբելով մեր ուժերը' միասին կարող ենք հաղթահարել մեր առջև ծառացած դժվարությունները, հասնել խաղաղության, ներդաշնակության ու ամբողջականության, և այդ մթնոլորտում կերտված հայրենիքը թողնել ժառանգություն մեր սերունդներին, փոխանցել նրանց մի պետություն, որ, բարձր պահելով իր արժանապատվությունը, համագործակցում է տարածաշրջանի պետությունների հետ հանուն մեկ ընդհանուր նպատակի' խաղաղության և համերաշխության պահպանման:

Վահան Քերոբյան

23.04.2010թ.